جيتك وانا قلبي من الهم ممزوع

كلن بها الدنيا له أخوان وأربوع
	ومن وين ماوجه يلاقي ربوعه
لاضايق باله ولا شاكين جوع
	ولامنتظر شيء يجيه ويروعه
ماشاف هماً ساكنً بي من اسبوع
	أركى على قلبي وفكري يموعه
هماً سطابي واخلف الطبع والطوع
	وكلن يشوف وقال مخلف طبوعه
واليوم يابدر الغلا جيت مقطوع
	وأنا اعتبرك الدار كمه ونوعه
جيتك وانا قلبي من الهم ممزوع
	ومن زود هم القلب شكين ضلوعه
جيتك وانا فكري خالفه كل مشروع
	جيتك ومثلي يفضحنه دموعه
جيتك وانا اعرف جيتي مابها أرجوع
	جيتك ومثلي مايسرك رجوعه
جيتك وصوتي ماتصنت له اسموع
	لو كان مرخي كل فاطن سموعه
وابيك تعرف سر مابي منزوع
	وتشوف حبله لو يطول قطوعه
وتعالج أوضاعن تبين لها نوع
	وتشيل ماشال الجمل من متوعه
ونبقى سوى ونردد البعد ياكوع
	للي نوى يشبع مراده وطوعه