لو قلت ليك , اشتقت ليك , ابقى ما وصفت ليك
انا لسه شايل حبي ليك وبالجد كتير احتجت ليك
انا من لقيتك من زمان** حسيت معاني الريد أمان
شيدت بيك جنة فرح مليانه بالشوق والحنان
ما حسبت لي ريح الزمن
تاهت مراكبي مع المحن
ولما الفراق كان التمن
ضاعت سنين تاني ليك*** وبالجد كتير احتجت ليك
***********************************
من رحت من دنياي مشيت**انا اصلي أبدآ ما نسيت
لا شفت يوم لحظة هنا **لا ردت من بعدك هويت
جرح الغرام وظلم الحبيب
لا ببرى ابدآ لا بطيب
والليل يطول في الهم يجيب
وإنت لا بيك لا عليك**وبالجد كتير احتجت ليك
***********************************
ورغم العذاب البي طال ** بهواك يا حبي المحال
لا قدرت انساكم اروح** ولا رحت منك في الخيال
وحلفت ليك يوم السفر
انك معاي طول العمر
وكل يوم بعدك بمر
دايمآ بزيد احساسي بيك** وبالجد كتير احتجت ليك
*********************************
لو قلت ليك إشتقت ليك** ابقى ما وصفت ليك
انا لسه شايل حبي ليك** وبالجد كتير احتجت ليك
بالجد كتير احتجت ليك