شاعر يرد على فتاة تغازله

كل شبر بهالوسيعة ملك ربي تعلمين
وأعلم إن اللي خلقني هو خلق لك هالعيون


لكن انتي من جلستي وانتي فيني تحدقين
كن مابه ناس غيري بهالكراسي يجلسون


لو سمحتي عاد اسمعي وحتى لو ماتسمحين
المهم اللي بقوله تسمعينه ويسمعون


ع الأقل ليا نظرتك سوي روحك تستحين
غضي طرفك مثل غيرك خوف ربعي يلمحون


الركادة عاد زينه والحياء في البنت زين
وفيك جازم لا ركادة ولا حياءٍ يذكرون


تعرفيني؟ اعرفك؟ ماأذكر إنا ملتقين
لا أعرفك من تكوني ولا تعرفي من أكون


واطمئني إن كان قصدك بس فيني تشبهين
ماهو أنا اللي تعرفيه والبشر يتشابهون


مادريتي من التشابه يخلق الله اربعين
وأعرف أربع يشبهنك بس والله يستحون


وإن كان قصدك شي ثاني عاد قولي وش تبين
خايف إنا نصير فرجه واللي ماشتروا يتفرجون


وإذا ببالك عاجبتني لا يحوشك تحلمين
صح ربعي من جمالك فيك صار يمدحون


بس وش لي في حلاتك دام فيها ترخصين
حشمة البنت وحياها والكرامة يلفتون


ولو توفر فيك هذا مع حلاتك تبشرين
ماهو أنا ألف غيري باب بيتك يطرقون


وش علامك رغم كل اللي أقوله وتسكتين
مو طبيعي هالسكوت وهالبرود وهالسكون


انتي خرساء اسئلك ولا منتي تسمعين؟
قالوا ربعي ذي كفيفة قلت لا لا تمزحون


لين شفتك يوم رحتي يمسكونك باليدين
مادريت إلا عيوني أربع أربع يذرفون


آه ياني منه مشهد يوم شفتك ترحلين
جيت اشوف عيون ربعي لقيت الكل يدمعون


يالكفيفة يالعفيفة إن قلت آسف تقبلين؟
يغفر الله ذنوب عبده ليا خطا وهل تغفرون؟